बागडोगरा, २७ मे (सिलगढी क्रोनिकल) – सिलगढी उपमहकुमाअन्तर्गत अपर बागडोगरा ग्राम पञ्चायतमा राजनीतिक तनाव देखिएको छ। तृणमूल कांग्रेसका असन्तुष्ट सदस्यहरूले कांग्रेसका पञ्चायत सदस्यहरूसँग मिलेर टीएमसी नेतृत्वको बोर्डविरुद्ध अविश्वास प्रस्ताव दर्ता गरेका छन्।
रिपोर्टअनुसार, मे २५ मा कुल १३ जना पञ्चायत सदस्यहरूले नक्सलबारी बीडीओ समक्ष अविश्वास प्रस्ताव पेश गरेका हुन्।
२१ सदस्यीय अपर बागडोगरा ग्राम पञ्चायतमा अघिल्लो पञ्चायत निर्वाचनमा तृणमूल कांग्रेसले ११ सिट जितेको थियो। कांग्रेसले ७ सिट, भाजपा ले २ सिट र आदिवासी विकास परिषद्ले १ सिट जितेको थियो। बहुमतको समर्थन पाएपछि टीएमसीका सञ्जीव सिन्हा प्रधान बनेका थिए।
टीएमसीका असन्तुष्ट पञ्चायत सदस्य कुलभूषण शर्माले प्रधानले विकास कार्य गर्न असफल भएको आरोप लगाए। त्यसैले विभिन्न दलका सदस्यहरू एकजुट भएर उनलाई हटाउने प्रयासमा लागेको उनले बताए। तर पार्टीविरुद्ध जानु सही निर्णय थियो कि थिएन भन्ने कुरा समयले बताउने उनको भनाइ थियो।
कांग्रेस पञ्चायत सदस्य तथा विपक्षी नेता लक्ष्मी थापाले पनि प्रधानले पर्याप्त काम नगरेको आरोप लगाइन्। उनका अनुसार, ६ जना टीएमसी र ७ जना कांग्रेस सदस्यहरूले संयुक्त रूपमा अविश्वास प्रस्ताव ल्याएका हुन्।
यता प्रधान सञ्जीव सिन्हाले आफूलाई अविश्वास प्रस्तावबारे कुनै जानकारी नभएको बताए। कसले र किन प्रस्ताव ल्यायो भन्ने विषयमा पनि आफू अनभिज्ञ रहेको उनले बताए।
