सिलगढी, ०२ जुन (सिलगढी क्रोनिकल) – महिलाहरूका लागि राज्य सरकारले सुरु गरेको निःशुल्क बस यात्रा सेवापछि उत्तर बंगालका विभिन्न क्षेत्रमा अन्योलको अवस्था देखिएको छ। केही निजी बस सञ्चालकहरूले सरकारी बससँग मिल्दोजुल्दो नाम र रङ प्रयोग गरी यात्रुलाई झुक्याइरहेको आरोप लागेको छ।
यस योजनालाई महिला यात्रुहरूले स्वागत गरेका छन्। तर केही निजी बसहरू “NBST” नाममा सञ्चालन भइरहेको र तिनको रङ सरकारी “NBSTC” बससँग मिल्दोजुल्दो रहेको गुनासो आएको छ।
आरोपअनुसार धेरै महिला यात्रुहरूले ती बसहरूलाई निःशुल्क यात्रा योजनाअन्तर्गतको सरकारी बस ठानेर चढेका छन्। पछि ती निजी बस भएको थाहा पाएपछि उनीहरूबाट भाडा लिइएको बताइएको छ।
यस विषयमा विरोध जनाउँदै बंगीय हिन्दू महामञ्चका सदस्यहरूले मंगलबार सिलिगुडी क्षेत्रीय यातायात कार्यालय (RTO) मा ज्ञापनपत्र बुझाएका छन्।
संगठनले उक्त अभ्यास तत्काल रोक्न र दोषीमाथि कडा कारबाही गर्न प्रशासनसँग माग गरेको छ।
संगठनका प्रतिनिधिहरूले यात्रुलाई यसरी भ्रममा पार्नु अस्वीकार्य भएको बताउँदै प्रशासनले छिट्टै हस्तक्षेप गरी समस्या समाधान गर्ने अपेक्षा व्यक्त गरेका छन्।
